CAGAYAN DE ORO CITY – Nanganti si City Mayor Rolando ‘Klarex’ Uy nga andam daw nila ipakanselar ang gisudlang kontrata tali sa Cagayan de Oro Water District o COWD ug kompanyang Metro Pacific rason naporma ang Cagayan de Oro Bulk Water Incorporated o COBI dinhi sa syudad.
Kini human unang gitahasan sa mayor ang konseho nga mopasar sa resolusyon aron aghaton ang COWD nga mohatag sa kopya sa kontrata diin nalatid ang mga probisyon nga dunay pagpausbaw sa bayronon sa tubig matag-ligid sa tuig.
Miingon ang mayor nga dili niya gusto nga basta-bastahon lang sa COWD ug COBI nga mopakang sa usbaw sa bayronon sa tubig nga walay konsultasyon sa katawhan sa dakbayan.
Samtang dili angay basulon ang pagsulod sa kompanyang Metro Pacific nga maoy mipadayon sa serbisyo sa Rio Verde Bulk Water aron dili mawd-an sa suplay sa panubig ang dakong bahin sa dakbayan.
Namahayag si kanhi City Mayor Oscar Moreno nga saksi kini sa gisagubang nga suliran sa COWD rason nga mipalapad sa ilang serbisyo ang MetroPac ug natukod ang COBI.
Gipasabot sa kanhi mayor nga gikinahanglan usab ang usbaw sa bayronon aron magamit sa pagpalambo sa serbisyo sa ahensiya.
Siya miingon nga kutob lang sa pagpasikat ang gihimo sa kasamtangang administrasyon nga konohay pabor sa katawhan apan wala masabti ang tinud-anay nga kahimtang sa panubig sa sa dakbayan.
