CAGAYAN DE ORO CITY – Wala ilha sa regular management nga nilangkuban sa organic workers sa Cagayan de Oro City Water District o COWD ang unom ka bulan nga lugway sa Local Water Utilities Administration o LWUA sa pagdumala sa interim board of directors ug sa manager nila nga si Fermin Jarales.
Kini human naglugwa sa sulat-pahayag ang First Labor Organization of the Cagayan de Oro City Water District (FLOW) nga unyon sa mga empleyado nga dili nila ilhon ang nakuptang dokumento sa grupo ni Jarales gikan sa LWUA.
Miingon ang grupo nga hangtod nga maka-presentar sa lehitimong dokumento ang interim mngt nga ilang gipangayo,ayha pa sila mohatag sa pag-ila niini.
Dugang sa ilang pahayag nga mosunod lang sila sa legal orders gikan sa regular COWD board of directors.
Giklaro sa FLOW nga gitahod nila ang LWUA full intervention apan dili sila kumbinsido nga pakit-an lang sa certification gikan sa board secretary kay nagtangag kini sa daghang isyung legal.
Una nang namahayag si acting regular COWD BOD chairman Gerry Caño nga ilang i-enstolar pagka-generel manager ni Engr Edna Najeal kay mi-retiro na si Engr Antonio Young sa miaging tuig.
Apan namahayag usab si Jarales nga dili obligasyon sa interim mngt nga hatagan sila’g kopya sa LWUA order kay igo lang pud kini gimanduan sa pagdumala sa COWD.
Siya miingon nga maoy angay buhaton sa pikas kampo ang paghangyo direkta sa LWUA sa kopya aron matagbaw sila sa ilang kagustuhan.
Namugos kini nga dili usab maayo nga hatagan niya sa kopya ang kontra kaniya nga gamiton ra usab nila sa paggukod-legal sa mga kalihukan nga gipatuman nila sa COWD nga sugo sa national government.
