CAGAYAN DE ORO CITY – Giawhag karon sa 4ID,Philippine Army ang mga sakop ni anhing CPP-NPA founder Prof. Jose Maria Sison nga sugdan na ang pagsalikway sa hingpit sa armadong pakigbisog batok sa gobierno.
Miingon si 4ID spokesperson Army Maj. Francisco Garello Jr nga klaro na nga dakong pakyas ang pakigbisog ni Sison diin naabtan pa kini sa iyang kamatayon gumikan sa gihambing sakit sa The Netherlands.
Gibutyag ni Garello nga unta kon kinsa man ang makapuli sa papel ni Sison,angayang usbon na ang direksyon niini ug dili itugyan sa kalautan ang ilang mga sumusunod.
Sa Northern Mindanao-Caraga regions,ubay-ubay usab sa ilang top officials ang napatay ug nangdakpan sa mga otoridad.
Samtang nakaandam ang Police Regional Office 10 sa bisan unsa nga pag-atake nga himoon sa mga galamay ni Sison batok sa gobierno.
Gihimo ni PRO 10 spokesperson Police Maj Joann Navarro ang katin-awan isip tubag sa panganti sa mga sakop ni Sison nga mohimo’g lapad nga opensiba sulod sa napulo ka adlaw.
Miingon si Navarro nga apil na sa ilang Oplan Ligtas Paskuhan 2022 ang mga kalihukan sa CPP-NPA nga ilang gipangandam sanglit paangat ang anibersaryo niini sa sunod semana.
Sa panahon ni kanhi Presidente Rodrigo Duterte,nahimong init ang lantugi nila ni Sison kabahin sa isyu sa gibungkag nga negosasyon tali sa gobierno ug CPP-NPA-NDF.
Hisayrang si Duterte ang miputol sa GRP-CPP-NPA-NDF peace negotiation ug gihataga’g niya’g trabaho ang local govt officials nga mismo mangunay pagsulbad sa mga isyu nga gihimong kapital sa pikas grupo pinaagi sa gilugwa nga mando ehekutibo numero 70 o ‘whole of the nation approach’ diin miani sa mga positibong resulta.
