Aminado ang National Alliance of Broadcast Unions nga nabalaka ang pundok sa cyber libel case nga gipasaka ni Davao City Representative Paolo “Pulong” Duterte batok sa pipila ka miyembro sa GMA Network.
Gipasabot ni Jon Villanueva sa NABU-SENTRO nga ang maong lakang nagdala og tataw nga chilling effect ug kahadlok sa mga peryodista ug media outlets nga naghimo lamang sa lehitimong trabaho sa pagbalita.
Tungod niini, nanawagan ang maong kapunungan sa tanang nagpaluyo sa gawasnon nga pamahayag nga magkahiusa ug batokan ang bisan unsang porma sa pagpahilom sa media.
