Wala pa mawad-i sa paglaum ang mga Duterte Die-Hard Supporters nga makauli pa sa Pilipinas si kanhi Presidente Rodrigo Duterte bisan pa sa iyang presensya karon sa The Hague Netherlands.
Sumala ni Aerol Torralba, padayon ang suporta sa mga tagasuporta ni Duterte dili lamang dinhi sa nasud kondili apil na usab ang mga Overseas Filipino Workers sa nagkalain-laing bahin sa kalibutan.
Sa interbyu sa Bombo Radyo, giingon ni Torralba nga matag adlaw adunay mga Pilipino nga nagbisita sa lugar diin nagpuyo si Duterte sa The Hague, ug nahimo kining simbolo sa ilang padayon nga suporta sa kanhi lider.
Dugang pa niya nga nagpadayon usab ang mga kalihokan sa mga supporter sama sa mga signature campaign ug ubang aktibidad aron ipakita ang ilang panawagan ug suporta kang Duterte.
Matud pa sa kagawad nga bisan pa sa mga hagit nga giatubang karon sa kanhi presidente, nagpadayon gihapon ang ilang pag-ampo alang kaniya.
Nagtuo si Torralba nga moabot ang panahon nga makab-ot ang hustisya nga ilang gihandom alang kang Duterte ug nga adunay paglaum nga makauli gihapon kini sa Pilipinas. (By James Oliver)
