Nagpahigayon sa bilateral meeting si Defense Secretary Gilbert Teodoro ug Japanese Defense Minister Shinjiro Koizumi sa Makati City kagahapong adlawa, Mayo 5.
Gidawat sa kalihim ang mga opisyal ug delegasyon gikan sa Japan samtang gisiguro sa Japanese official ang padayon nga paghatag sa tabang sa Pilipinas aron lig-onon ang relasyon sa duha ka nasud.
Gipasalamatan ni Teodoro ang Japan sa ilang suporta, lakip na ang pagtabang sa pag-apula sa sunog sa landfill sa Navotas City sa miaging bulan.
Gikatakda usab nga mag-uban ang duha aron motambong sa Balikatan exercise sa Ilocos Norte diin gamiton sa Japan ang ilang Type 88 surface-to-ship missiles, human una nga nakigkita si Koizumi kang Presidente Ferdinand Marcos Jr ug misiguro sa seguridad nga tabang alang sa Pilipinas. (phillip ariata)
