CAGAYAN DE ORO CITY – Walay angay nga ikaalarma ang katawhan sa Northern Mindanao kabahin sa nabaniug nga naigo sa gitoohang Nipah virus ang daghang mga tinun-an ug mga magtutudlo sa upat ka nag-unang pribadong mga tunghaan sa dakbayan.
Kini human miani’g kataranta sa mga ginikanan ug mismo sa katawhan ang gimantala nga university memorandum diin nagsulti nga magbalik online classes una ang ilang elementary ug highschool departments tungod sa gidudahan nga bayrus.
Miingon si DoH 10 officer-incharge Director IV Dra. Ellenieta Gamolo nga kaanggid ang mga sintomas nga gibati sa mga biktima sa maong bayrus apan usa lamang kini ka INFLUENZA LIKE ILNESS o ILI.
Siya miingon nga dili lamang ang kabataan ug mga magtutudlo sa maong mga tunghaan ang nakasinati niini apan bisan ang ubang bahin sa rehiyon.
Dugang ni Gamolo nga walay angay kabalak-an kay sukad mibuto ang virus sa Malaysia ug Singapore sa tuig 1998,walay record ang DoH-Manila nga nasudlan ang Pilipinas niini.
Samtang mihangyo si City Mayor Rolando ‘Klarex’ Uy sa katawhan nga subli ipatuman ang health safety protocol tungod sa taas nga kaso sa ILI nga miigo sa daghang mga tinun-an ug mga magtutudlo sa pipila ka dagkong tunghaan sa dakbayan.
Kini human nakaabot kang Uy ang report ni City Health Office head Dra.Rachel Dilia kabahin sa nagkasakit nga kabataan sulod sa pipila ka eskuwelahan sa syudad.
Kini ang rason nga naglugwa siya’g mando-ehekutibo diin nagtumong sa pag-obserbar sa pagsul-ob balik sa facemask,social distancing ug ubang health protocols samtang uso pa ang influenza illness cases sa dakbayan.
Tipik sa mga tunghaan diin apektado ang ilang mga estudyante ang Xavier University;Liceo de Cagayan University;Lourdes College ug Corpus Cristi School.
Sa pikas bahin,bisan sa mga publikong tunghaan,natala gihapon ang mga pagsakit sa pipila sa ilang mga tinun-an epekto sa nagpasulabi nga influenza like illness sa dakbayan.
Kini ang gikompirmar ni City Schools Division Asst Supersivor Dr. Audie Borres sa interbyu sa Bombo Radyo.
Miingon si Borres nga hinoon,dili susama kadaghan sa ihap sa mga estudyante sa mga pribadong tunghaan nga mi-resulta sa online classs sessions.
Siya miingon nga mihimo usab sila sa health adjustments aron mabutang sa seguro nga dili maapektuhan ang panglawas sa kabataan ug sa ilang mga magtutudlo palibot sa dakbayan.
Unang naglugwa sa health advisory ang Dept of Health 10 kabahin sa kasamtangang kahimtang sa panahon diin nag-resulta sa ILI cases sa rehiyon.
