CAGAYAN DE ORO CITY – Gipaniguro sa DSWD -10 nga dili na masubli nga magka-stampede ang katawhan nga mokuha sa financial educational assistance sa napulo ka payout areas sa rehiyon.
Kini aron kalikayan nga may gininakan o tinun-an na usab ang mangakuyapan gumikan sa pagtinuluray ug kapi-ot samtang maglinya aron makakuha sa ayudang pinansyal gikan sa gobierno.
Gibutyag sa bag-ong regional director sa DSWD-10 nga si Ramel Jamen nga 3-mil 500 ka verified beneficiaries lang ang e-akomodar sa ilang payout centers.
Siya miingon nga kadtong napadal-an sa text messages lang sa ilang buhatan ang lehitimo maka-claim sa cash ayuda ug wala na’y laing atimanon pa ugmang adlawa.
Anaa sa 12-mil ka tinun-an ang hataga’g cash assistance dinhi sa rehiyon balor sa 120 milyones ka pesos sulod sa unom ka Sabado.
Dugtong usab niini,gimanduan ni DILG 10 regional director Arnel Agabe ang hingtungdang local govt units sa cash payouts sa educational assistance sa DSWD 10 nga motabang aron masiguro ang kahapsay ug seguridad ugmang adlawa.
Apan gipasabot ni Agabe nga gidid-an ang bisan kinsa nga brgy opisyal,mayor o gobernador nga mangunay pagpang-apud apod sa cash ayuda kay bugtong mga personsahe lang sa DSWD-10 ang gitugtan niini.
Siya miingon nga gituyo kini ni DILG Secretary Benhur Abalos aron likayan nga dunay mapaburan ang LGUs officials samtang kamulo ihatag ang tabang-pinansyal sa mga tinun-an.
Kabahin sa dunay cash payout distributions ang 300 ka tinun-an sa Iligan City ug lungsod sa Tubod,Lanao del Norte;Ozamiz City ug Oroquieta City sa Misamis Occidental nga may usa ka libo;mil-50 sa mga syudad sa Valencia ,Malaybalay ug Maramag sa Bukidnon, 300 sa Mambajao sa Camiguin;150 sa syudad sa Gingoog ug 700 sa Cagayan de Oro dinhi sa Misamis Oriental.
Samtang gipasalig sa Police Regional Office 10 nga dili na masubli ang pagdasok sa mga tawo aron lamang makakuha’g ayudang pinansiyal nga pag-edukasyon sa ilang mga tinun-an sa nagkada-iyang lebel.
Kini ang mando ni PRO 10 regional director Brig Gen Lawrence Coop sa iyang city ug provincial police directors ngadto sa mga lugar nga dunay cash payouts ugmang adlawa.
Gibutyag ni Coop nga klaro na ang kamaduan sa ilang tropa aron mahataga ang ensaktong seguridad sa kalihukan napulo ka payout areas ugmang adlawa.
