CAGAYAN DE ORO CITY- Kasuhan sa pagsupak sa Dangerous Drugs Act of 2002 o Republic Act 9165 ang mag-amahan kuyog ang laing tulo ka lalaki sa piskalya sa probinsya nga nakabase sa Cagayan de Oro City.
Kini human nasikop ang mga dinakpan ang mag-amahan nga si Dixon Sambaan ug Van Oneal Sambaan nga pulos taga-Barangay Puntod sa syudad.
Si PDEA agent Ben Calibre miingon nga maoy target nila si Dixon nga giingong nag-mintinar ug drug den sa Barangay Kimaya,Jasaan,Misamis Oriental.
Kini ang hinungdan nga gilusad nila ang anti-illegal drug buy bust operation diin nasikop si Van Oneal ingon man sila si Fernando Gomotano;Fernan Macariloa ug McDoel Eballe.
Atol sa operasyon,napusilan sa mga operatiba sa PDEA-10 si Van Oneal kay gipamusil usab sila gamit ang kalibre 45 nga armas hinungdan nga naigo ang paa niini.
Narekober gikan sa mga suspek ang 25 gramo nga gitoohang shabu diin nagbalor sa P150-mil.
Samtang gipanghimakak usab sa edaran nga Sambaan nga namaligya kini’g droga sanglit igo lamang siya tiggamitan niini.
