Midagsa ang baga nga ihap miyembro sa Filipino community nga gipangulohan sa Duterte Diehard Supporters o DDS sa usa ka peaceful rally gawas sa International Criminal Court sa The Hague, Netherlands kagahapong adlawa.
Sumala ni Lucky Charm, Bombo International News Correspondent sa Netherlands, mitambong sa maong kalihukan ang mga DDS gikan sa nagkalain laing bahin sa Europa lakip ang mga representante ug lider sa Filipino communities sa Switzerland ug uban pang nasud.
Matod ni Charm, malinawon ang dagan sa rally ug walay naitalang kagubot sa maong lugar.
Giklaro usab niya nga kalmado ang mga supporters ni kanhi Pangulong Rodrigo Duterte ug ang ilang tumong mao ang pagpahayag sa ilang baruganan may kalabotan sa giatubang nga proseso sa kaso sa ICC.
Dugang pa niya, gusto usab ipaabot sa mga supporters ni Duterte sa Pilipinas nga likayan una ang sobrang emosyon ug pasagdan ang legal nga proseso nga ginapadayon sa international nga korte. (James Oliver)
