Robin Padilla Posibleng Atubangon ang Harboring ug Obstruction of Justice

Posibleng mag-atubang sa mga kasong harboring of persons ug obstruction of justice si Senador Robin Padilla kung mapamatud-an nga gitabangan niini si Senador Ronald Bato dela Rosa nga makagawas sa Senado human sa kagubot nga mibutho sa Senado niadtong Mayo 13 sa gabii.

Mao kini ang gibutyag ni Atty. Joel Mahinay sa Union of Peoples Lawyers in Mindanao (UPLM) diin iyang giingon nga kinahanglan masuta kung tinuod ba nga gipasakay ni Padilla si Dela Rosa sa iyang sakyanan human sa nahitabong kagubot sulod sa Senado.

Matod pa niya, adunay mga impormasyon nga si Padilla usa sa mga ulahing nakita nga kauban ni Dela Rosa sa wala pa kini nawala sa mata publiko atol sa operasyon sa mga otoridad.

Gipasabot usab ni Mahinay nga seryoso ang maong isyu tungod kay mahimo kini nga pagpanalipod sa usa ka tawo nga giila nga adunay giatubang nga legal nga proseso.

Dugang pa niya, makapaguol ang maong panghitabo tungod kay ang pipila ka mga lider sa nasud kuno wala na nagpakita sa hustong ehemplo ug dignidad nga angay makita sa mga magbabalaod sa Senado.