CAGAYAN DE ORO CITY – Naghinobrang politikanhong-interes lamang ang gi-basehan ni kanhi Pres Rodrigo Duterte sa iyang kagustuhang ibulag ang Mindanao sa nasudnong gobierno.
Kini ang rason nga gisulayan niya pagkuha ang pulso sa taga-Mindanao aron masukod kon unsa pa kakusog ug kalig-on ang iyang impluwensiya alang sa sunod nga mga eleksyon sa nasud.
Miingon si international law expert Atty. Antonio La Viña nga nahatagan na sa higayon si Duterte aron ibalhin sa pederalismo ang bicameral govt system sa nasud, apan wala siya molampos paghimo niini.
Hinoon,ang paglihok sa mga imbestigador sa International Criminal Court ubos sa pagtugot ni Pres Bongbong Marcos ang bug-at nga rason kon nganong mitingog ug nangatake ang mga Duterte sa administrasyon.
Samtang dili na gusto sa Bangsamoro Transition Authority o BTA nga mobalik pa ang kanhi Moro rebels pag-alsa’g mga armas aron kab-uton ang otonomiya alang sa ilang kaliwatan dinhi sa Mindanao.
Kini ang hinungdan nga dako sila nga supak sa gusto ni Duterte nga maglain ang Mindanao gikan sa national govt control.
Namahayag si BTA Deputy Parliament Speaker Omar Yasser Sema nga dugay na nila nga gisalikway ang armadong pakigbisog kuyog ang Moro Islamic Libertation Front o MILF ug Moro National Liberation Front o MNLF fighters kay nahatagan na sila sa pagtagad sa gobierno.
Samtang wala’y kapilian kay managsama nga giingong dunay kalambigitan sa isyu sa kurapsyon ang kanhi Duterte ug kasamtangang Marcos administration.
Kini ang hait nga pagsaway sa ilang kritiko nga si Atty. Ed Cuaresma,kanhi presidente sa Intergrated Bar of the Philippines o IBP-Misamis Oriental chapter sa isyu sa pagbulag sa Mindanao sa Pilipinas.
Namahayag si Cuaresma nga walay moral ascendancy nga mo-akusar si Duterte nga dakong adik si Marcos kay managsama sila nga dunay suliran niini.
