CAGAYAN DE ORO CITY – Panguluhan ni Pres Bongbong Marcos ang pagpanghatag sa tabang-pinansyal sa 10-mil ka pamilya nga grabeng apektado sa hulaw nga miigo dinhi sa Northern Mindanao region ning adlawa.
Kini alayon sa ikaduhang hugna paglusad sa Bagong Pilipinas Serbisyo Fair diin dunay 10-mil pesos cash nga ihatag si Marcos ngadto sa mga mag-uuma,mga mangingisda ug representasyon sa mga pamilya nga naglisod sa El Nino phenomenon.
Miingon si Ponyong Gabonada Jr,deputy director general sa BPSF nga himoon sa presidente ang ceremonial cash distribution sa syudad sa Iligan ug mismo dinhi sa dakbayan.
Gawas niini,halos 300-milyones pesos nga balor usab sa ubang mga programa ug mga serbisyo ang itunol sa duha ka adlaw nga kalihukan ubos sa pag-abag ni House Speaker Martin Romualdez ug mga kongresista dinhi sa rehiyon.
Mangulo usab si First Lady Liza Marcos sa usa ka kalihukan nga himoon sa syudad sa El Salvador,Misamis Oriental ning adlawa.
Dugtong niini,ikatag sa Police Regional Office 10 ang 500 ka pulis sa mga lokasyon nga magkalahi nga dalikyatan sa presidente ug sa unang ginang ning adlawa.
Miingon si PRO 10 spokesperson Police Maj Joann Navarro nga anaa lang sa normal ang security status sa Camp Alagar apan dunay hugot nga koordinasyon sa 4ID ug ubang law enforcement agencies pagsiguro nga luwas ang first couple sa mga tambungang kalihukan.
Namahayag si Navarro nga nag-unang tuyo usab sa paghugot seguridad ang kaluwasan sa katawhan ug ubang VIPs nga molambigit sa duha ka adlaw nga aktibidad kutob ugmang adlawa.
