Gipahibalo ni OCD-10 Regional Director Antonio Sugarol nga gipasaka na sa Philippine Atmospheric, Geophysical and Astronomical Services Administration (PAGASA) ang status sa nasud ngadto sa El Niño Alert.
Kini tungod kay misaka na sa 70 porsyento ang posibilidad nga moigo ang grabeng kainit sulod sa mosunod nga duha hangtod tulo ka bulan. Matud ni Director Sugarol, bisan wala pa ang hingpit nga El Niño, klaro na kaayo ang sobra nga kainit nga nasinati sa rehiyon, maong dili angay maghulat nga mograbe pa ang sitwasyon.
Tungod niini, gimandoan na sa Regional Disaster Risk Reduction and Management Council (RDRRMC) ang tanang local government units sa Northern Mindanao nga i-aktibar ang ilang preparedness protocols.
Gipasiugdahan sa direktor nga kinahanglan andam na ang tanang emergency medical services ug ang mga mobility assets o sakyanan sa gobyerno.
Ang maong lakang gihimo aron masiguro nga full mission capable ang matag yunit, kompleto sa gasolina ug medical supplies, sa dili pa mobundak ang grabeng epekto sa ting-init. (JANE ABULAG)
