CAGAYAN DE ORO CITY – Dili imposible nga balik-alyansang politika ang partido Padayon Pilipino ug grupo ni kanhi City Mayor Oscar ‘Oca’ Moreno sa hisgutanang politikanhon dinhi sa dakbayan.
Kini ang tubag ni Padayon Pilipino Party Cagayan de Oro president ug 1st District Cong. Lordan Suan nunot sa paghiusa na sa puwersa ni City Mayor Rolando ‘Klarex’ Uy ug CdeO District 2 Cong. Rufus Rodriguez alang sa 2025 elections syudad.
Miingon si Suan nga dili matago ang kadagko sa maong mga pamilya nga naghiusa itandi kaniya nga bag-o ra sa politika rason nga kabahin sa tukion sa partido ang posibleng pagbugkos balik sa Emano-Moreno political alliance.
Miingon ang kongresista nga hinoon wala pa kini mahisguti nga kalambuan sa politika tali kaniya ug Misamis Oriental 2nd District Cong. Bambi Emano apan siguradong dili mapadaplin ang maong isyu.
Sa miaging May 2022 elections,kaatbang sa grupo nila ni Emano ug Suan alyansa ni Klarex ug Moreno sa syudad.
Apan sa pagtabok ni Rodriguez, dili imposible nga magkakuyog balik ang mga Emano ug mga Moreno batok sa liderato sa city hall.
Dumduman nga kanhi magka-alyado si Bambi ug Oca sa panahon nga pulos sila dagkong mga opisyal sa Misamis Oriental sa miaging mga katuigan.
Apan nasiak kini dihang misulod na sa syudad si Moreno sa paghupas sa iyang pagka-gobernador ug gikontra ang founder sa Padayon Pilipino nga si late City Mayor Vicente Emano tuig 2013.
Samtang si Bambi usab nahimong gobernador sa probinsya ug nahuman ang ilang tag-tulo ka termino ni Moreno nga wala mabalik ang pagsilbing alyansa nila sa politika.
Hisayrang si Moreno may anak nga konsehal sa unang distrito pinaagi ni Imee Moreno samtang kasamtangang 2nd district city councilor usab ang manghod nila ni Bambi nga si Yvy Emano.
