CAGAYAN DE ORO CITY- Gikasakit ni Gov Bambi Emano ang gihimong pagpang-harass sa rebeldeng New Peoples Army o NPA diha sa Brgy Kibanban ug Brgy Quezon sa Balingasag Misamis Oriental.
Si Emano miingon nga mismo ang barangay kapitan sa maong lugar ang mitawag kaniya aron magpahibalo nga gi-harass sa mga rebelde ang army detachment sa maong lugar.
Gikalipay na lamang ni Emano nga walay namatay o naangol sa dihang gi-harass sa mga armadong grupo ang mga sundalo sa maong lugar nga miresulta sa panag-engkwentro.
Samtang nagdumili si Emano sa pagpangulo sa pag-negosyar sa mga rebeldeng NPA nga buhian ang ilang prisoners of war nga si PO2 Jerome Natividad.
Matud ni Emano nga dili una siya mag-apil sa mga negosasyon aron dili siya mainitan ug madudahan ilabina nga nabalaka ang iyang mga ginikanan sa seguridad niini.
Apan gipasalig ni Emano nga suportahan niya ang tanang lakang may kalabutan sa mga peace negotiations sa lalawigan.
