CAGAYAN DE ORO CITY – Gipamatud-an ni kanhi Cagayan de Oro Water Distrit o COWD General Manager Engr. Rachel Beja nga bakak ug propaganda lamang sa grupo ni City Mayor Rolando ‘Klarex’ Uy nga apil si former city mayor Atty. Oscar Moreno nga nagpirma sa water joint venture contract tali sa kompanyang Metro Pacific Waters.
Kini human gipatoo sa city govt nga mipirma’g apil sa kontrata si Moreno aron water supplier ang MetroPac sa syudad.
Miingon si Beja nga kutob lang sa pagpahulagway si Moreno ug kadagkuan sa COWD ug MetroPac kay natigayon ang contract signing mismo sa LUWA office.
Una niini,gibarugan ni Moreno nga dugang pagdani ang iyang pagpakigkita sa kadagkuan sa MetroPac aron mamuhunan dinhi sa syudad.
Samtang gisugyot ni Beja nga mangayo’g kopya ang city council sa review findings sa Office of Government Corporate Counsel o OGCC sa joint venture contract tali sa MetroPac- COBI.
Kini human kompirmaha ni Beja nga gimanduan sa OGCC kaniadto ang COWD board of directors nga sulbaron ang iyang contract observations ayha ipatuman sa syudad.
Miingon si Beja nga mismo siya ang miprangka sa COWD-BoD nga namiligro nga mabutang sa dakong disbintaha ang katawhan sa pipila ka probisyon sa kontrata apan gibalewala kini sa kanhi naglangkob sa hunta-direktiba kaniadto.
