CAGAYAN DE ORO CITY – Gitawag ni kanhi City Mayor Oscar Moreno ang task force fact finding sub-committee nga gipanguluhan ni Kag. James Judith nga dakong mga talawan.
Kini human unang gipasiatab ni fact finding sub-committee chairman Kag. James Judith nga ilang gisahon si Moreno aron sutaon ang kalambigitan niini sa kontrobersyal nga kontrata sa panubig sa syudad.
Namahayag si Moreno nga mga talawan ang gisugo ni City Mayor Rolando ‘Klarex’ Uy aron siya ipiton ug gub-on gamit ang isyu sa Cagayan de Oro Water District – Cagayan de Oro Bulk Water Incorporated o COWD-COBI contract controversy.
Siya miingon nga kon gipatambong kini sa pagdungog,nangandam usab kini sa mga pangutana nga iyang ipatubag sa grupo ni Judith.
Apan sa pikas bahin,dili pa absuwelto si Moreno kon wala man kini ma-imbitar sa upat ka adlaw nga imbestigasyon sa task force fact finding sub-committee sa konseho.
Kini ang depensa ni Judith kabahin sa gisulti ni Moreno nga nahadlok sila pagpatawag kaniya sa imbestigasyon.
Siya miingon nga susihon una niini ang financial side sa kanhi COWD technical working group nga nakatutok sa maong kontrata kon angay o dili na i-apil ang kanhi mayor nga imbestigaran.
