CAGAYAN DE ORO CITY – Dili kumbinsido si Kag. James Judith,chairman sa fact finding sub-committee nga walay direktang kalambigitan si kanhi City Mayor Oscar Moreno sa paspas nga pagka-porma sa kontrata sa panubig tali a Cagayan de Oro Water District – Cagayan de Oro Bulk Water Incorporated o COWD-COBI sa dakbayan.
Kini human nasuta sa ilang upat ka adlaw nga imbestigasyon nga dunay upat ka paryente ni Moreno nga naglihok sulod sa wate district.
Subay sa pagduda ni Judith nga posibleng napasayon ang pagka-porma sa kontrata kay kadugo niini sila COWD chairman of the board Eduardo Montalban;board of directors Concepcion Roa Quiblat;late Atty. Mateo Delegencia ug bisan si COWD retainer nga si Atty. Vincent Seriña.
Apan namugos si Moreno nga dili madiktahan ug hinoon gawasnon daw sa ilang mga hukom ang naglangkob nga kanhi opisyales sa hunta-direktiba sa COWD sa panahon ni Moreno.
Kini ang tubag sa kanhi mayor batok sa pagduda sa gitawag niya nga ‘fault finding’ sub-committee nila ni Kag. James Judith kon nganong sayon ang pagsulod sa kompanyang MetroPac Waters ug naporma ang COWD-COBI joint venture agreements.
Namahayag si Moreno nga sayop ang gipatoo ni Judith kay taas nga proseso ang agian sa pagka-porma sa kontrata ayha opisyal nasugdan pag-abot na sa tuig 2018.
Samtang sa pikas bahin,milahi na ang tono sa sinultihan ni Uy pag-abot sa isyu sa panubig sa dakbayan.
Kini human una niya gisulti nga wala mahadlok ang dakbayan kon ipadayon pagputol sa COBI ang suplay sa tubig ngadto sa pasilidad sa COWD.
Miingon si Uy nga katungod daw sa COBI nga paghimo niini ug ang mahimo lang sa dakbayan mao ang pagpangandam aron dili mahasol ang katawhan.
Una nang mibahad ang COBI nga kutob na lang sila sa Marso 31 mosuplay sa tubig apan nahangyo kini sa city council rason nga petsa 12 sa Abril na ang bag-ong ultimatum kon di gyud makabayad ang COWD sa ilang obligasyon.
