Paspas nga gibuak nila Defense Secretary Gilberto Teodoro ug AFP Chief of Staff Gen. Romeo Brawner ang mga sayop ug malisyosong impormasyon nga gipakaylap sa batan-ong mga Chinese journalist nga mitambong sa Shangri-La Dialogue sa Singapore, kagahapon.
Gitin-aw ni Teodoro nga walay opisyal nga delegasyon gikan sa China ang mitambong sa dayalogo sa International Institute for Strategic Studies (IISS) sa Shangri-La.
Gibutyag sa duruha nga adunay mga indibidwal nga nagpa-ila nga sakop sa prensa, apan pulos nagbato sa mga pangutana nga intensyonal ang pagdagmal sa Pilipinas batok sa lihok sa China sa West Philippine Sea.
Una niini, gireklamo sa mga reporters sa China kung nganong wala sila tagda ni Brawner dihang nangayog impormasyon sa tensyo sa South China Sea.
Si Brawner mitin-aw nga gitu-is sa maong grupo ang maong impormasyon tungod kay ang ilang timing sa pagpangutana mao usab ang timing nga musulod na kini sa gisugdang bilateral meeting sa Shangri-La ug kaalyadong nasud.
