CAGAYAN DE ORO CITY – Bantayunon ang posibleng pag-ulbo sa grabeng kagubot sama sa gubat tungod sa init nga bangi sa politika sa mga lideres nga nagkupot sa tag-as nga katungdanan sa nasud.
Kini ang pasidaan sa ilado nga feng shui expert nga si Jeffrey Ventura subay sa Chinese Wood Dragon sulod ning tuiga.
Miingon si Ventura nga angayang gilayon kini mapangitaan sa sulbad aron dili mo-resulta sa giyera ilabina nga nagkainitay sila Pres Bongbong Marcos ug kanhi Pres Rodrigo Duterte.
Samtang giaghat ni law professor ug kanhi City Mayor Oscar Moreno sa mga kongresista nga dili na pugson ang charter change sa nasud.
Kini tungod kay klaro ug dili malipat ang katawhan sa tinud-anay nga katuyuan kon nganong pugson nga usbon ang konstitusyon gamit ang People’s Initiative.
Miingon ang kanhi kongresista sa Misamis Oriental nga mas ensakto ang gisubay nga baruganan sa senado kabahin sa pagpanalipod sa interes sa katawhan pinaagi sa pagsupak sa charter change proposal.
