CAGAYAN DE ORO CITY – Nalumpag na daw sa operasyong-militar ang liderato sa commnist terrorist group o CTG nga dugay na nga naglihok sa mga kalungsuran sa Bukidnon.
Kini human milampos ang puwersa ni 403rd Infantry Brigade commander Brig. Gen Michelle Anayron pinaagi sa mga batalyong-militar niini pagdani kang CTG regional high ranking official Randy Bayot,alyas Gov,48 anyos nga taga-Sitio Sunny Day,Brgy Butong,Quezon,Bukidnon pagsalikway sa armadong pakigbisog ug mobalik na sa gobiernio.
Matud ni 4ID commanding officer Army Maj. Gen Jose Maria Cuerpo II nga tungod sa pagbiya ni Bayot sa armadong kalihukan, wala na usa’y rason ang ubang rebel commanders ug members nga magpabilin pa aron masalbar ang ilang mga kinabuhi batok sa mga operasyon sa gobierno sa kabukiran.
Giila ni Cuerpo nga dakong kadaugan sa katawhan sa Bukidnon nga napabalik sa normal nga sitwasyon ang kinabuhi ni Bayot pinaagi sa pagpaningkamot usab sa army commanders ubos sa 1st Special Forces Batallion; 8th IB; 88th IB ug 26 IB operations diin daghan sa mga kauban nini ang misalikay sa armadong kalihukan nga nasudlan.
Gisaksihan ang pagtahan ug presentasyon sa militar sa mitahan nga mga rebelde sa mga dagkong opisyal sa Bukidnon – LGU ug ubang mga representante gikan sa national government agencies.
Gikaintapan nga CTG member si Bayot kay subay sa militar nagsilbi kining tigpamaba/2nd deputy secretary/finance officer sa regional staff sa North Central Mindanao Regional Committee nga nakabase sa Bukidnon.
Sulod sa dugay’ng panahon niya sa kalihukan,si Bayot nag-atubang usab sa duha ka ihap sa murder cases,daghang frustrated cases,destructive arson, kidnapping ug serious illegal detention.
Sa pagtahan usab ni Bayot balik sa gobierno,dala nila sa iyang mga kauban ang lima ka M-16 rifles ug M-14 nga apil sa gi-presentar atubangan sa local media sa 403rd Infantry Brigade Headquarters sa Malaybalay City kagahapon sa buntag.
Hisayrang sa tuig 2021, mitahan usab sa militar si Armando Daluniag alyas “Ambo” kinsa nagsilbing kumander sa Headquarters Force Neo ubos sa North Central Mindanao Regional Committee ug kanhi deputy secretary of Guerilla Front 89 ingon man ang iyang mga kauban bitbit ang mga tag-as nga armas.
