CAGAYAN DE ORO CITY – Giawhag ni Task Force Bangon Marawi chairman Sec Eduardo del Rosario ang mga bakwit nga nagpuyo sa sector 2 most affected area nga mahimo na sila nga makakuha’g permit gikan sa lokal nga kagamhanan sa Marawi City.
Kini sa tumong nga mahatagan sila’g pagtugot nga matul-id ang ilang nadaut nga panimalay sa Marawi siege sunod bulan.Miingon si Del Rosario nga tugtan na nila ning bulana ang mga nanimuyo sa sector 1 nga makabisita sa ilang mga panimalay.
Samtang mahimo usab nga mabisita sa internally displaced persons o IDPs ang ilang panimalay sa sector 8 ug 9 sa bulan sa Setyembre hangtud Oktubre.Una nang gitin-aw ni Del Rosario nga dili pa mapuy-an sa nga IDPs ang ilang nabiyaan nga panimalay tungod kay wala pa kini suplay sa tubig ug kuryente.
Sa laing bahin, dili manginlabot ang gobierno sa galastuhan sa pagtul-id sa nangaguba nga kabalayan sa internally displaced persons o IDPs nga dunay kapas o salapi nga magamit sulod sa most affected area sa Marawi City.
Namahayag si Task Force Bangon Marawi chairman Sec Eduardo del Rosario nga bugtong indigent o klaro nga kabus lamang nga IDPs ang ilang tabangan ug dili kadtong dunay ikagahom sa house repairs.
Gani, kasamtangang nagpahigayon sa social cartographic ang Department of Environment and Natural Resources o DENR aron mahibal-an kon kinsa ang tag-iya sa mga kayutaan nga gitukuran sa kabalayan sa IDPs.
Kahinumduman nga sugod karong bulana, gitugtan na ang IDPs nga makabalik sa ilang panimalay.
