Gikondena ni Rauf Sissay sa grupong Bagong Alyansang Makabayan (BAYAN) ang gihimong pag-post sa Facebook page sa usa ka municipal police station sa Davao Region diin gi-tag ang mga iladong aktibista ilabi na ang mga miyembro sa Kabataan Partylist isip mga wanted person.
Sumala ni Sissay, wala gibutang sa maong mga post ang bisan unsang violation o kaso batok sa mga gipangalanan, hinungdan nga giisip kini nila nga pamaagi sa pag-intimidate ug paghadlok sa mga progresibong grupo.
Dugang pa sa maong lider, kining maong aksyon nagpakita lamang sa tinguha sa mga awtoridad nga pahilumon ang ilang mga paningkamot sa pagduso sa katungod sa mga kabus ug uban pang sektor sa katilingban.
Sa pagtan-aw sa ilang grupo, kini nga lakang usa ka paglapas sa ilang mga katungod samtang wala pa gihapon nasulbad ang mga dagkong problema sa nasud sama sa kagubot ug korupsyon sa pangagamhanan.
Bisan pa sa maong mga pagpamugos, gipadayag ni Sissay nga magpadayon sila sa pagbarog alang sa ilang mga kawsa alang sa kaayohan sa mga Pilipino.
