CAGAYAN DE ORO CITY – Atubangon ni Pangantucan Mayor Miguel Silva Jr ang mga kasong kriminal nga nakasang-at sa sala ni RTC Branch 9 Presiding Judge Maria Theresa Camanong sa Malaybalay City,Bukidnon.
Kini human nadakpan na siya sa hiniusang operasyon sa kapolisan sa gitaguan niini nga safe house sa Compostela,Davao de Oro pinaagi sa mando sa korte sa miaging gabii.
Gibutyag ni Provincial Director Col Jovit Culaway sa Bukidnon PNP nga maoy basehan sa pagdakop kaniya ang duha ka ihap sa kasong sexual abuse ug statutory rape nga gipasaka sa ginikanan sa babayeng menor de edad sa korte sa miaging tuig.
Si Silva kinsa kandidato pagka-gobernador batok incumbent Bukidnon Gov. Rogelio Roque ang una nang misaad nga boluntaryong mopaubos sa kostudiya sa PNP oras molugwa na ang arrest warrant bato kaniya.
Apan kalit nausab ang iyang hukom ug kini nagtagu-tago sulod sa halos duha ka bulan ayha nadakpan sa Region 11.
Una nang gipamugos ni Silva nga politika ang nag-unang tuyo sa iyang mga kaatbang kon nganong giakusahan kini’g pagpanglugos ngadto sa menor de edad nga anak babaye sa ilang kaabag sa pinuy-anan.
Una niini,miduso’g piyansa ang mga abogado ni Silva apan gilayong gibasura kini ni Camanong kay wala tugti sa balaod makagawas ang usa ka akusado nga nag-atubang sa kasong lugos.