CAGAYAN DE ORO CITY – Nag-atubang sa kasong pagsupak sa Dangerous Drugs Act of 2022 ang gikonsidera sa anti-narcotics forces nga high value targets nga unang nadakpan sa hiniusang operasyon kuyog ang kapolisan sa Brgy Pindolonan,lungsod sa Bubong,Lanao del Sur.
Kabahin sa nasigpaw sa tropa ni Philipine Drug Enforcement Agency – Bangsamoro Autonomous Region in Muslim Mindanao regional director Gil Cesario Castro si Jamel Dimaporo alyas Ustad,29 anyos ug ang 19 anyos nga si Jalil Macaayong nga pulos residente sa maong probinsya.
Gibutyag ni Castro nga nabawi gikan sa mga dinakpan ang usa ka kilo sa gitoohang shabu nga dunay estimated market value nga halos siete milyones pesos ug ubang paraphernalia.
Nagsumikad ang pagka-aresto sa duruha nunot sa unang patug-an sa dinakpan nga si Lawa Abedin nga giingong nabawian usab sa halos siete milyones pesos nga gidudahang shabu sa operasyon ng PDEA-BARMM sa Barangay Bugaran,Piagapo,Lanao del Sur ning bulana lamang.
Nasaysay usab sa ahensiya nga sugod Enero hangtod ning kasamtangang semana ning tuiga,anaa na sa P30 milyon nga suspected shabu ang nabawi gikan sa pipila ka arestadong personalidad sulod sa BARMM.
