CAGAYAN DE ORO CITY – Nagsugod na sa pagdagsa ang mga deboto sa nagkadaiyang pilgrimage sites nga kabahin sa mitamod sa semana santa palibot sa rehiyon.
Kini gawas sa nakahan-ay’ng mga kalihukan sa simbahang Katolika nga maoy pinakapangulo sa paglab-as sa pasyon,pagpasakit,kamatayon ug pagkaban-aw ni Kristo-Hesus alang sa mga kristiyanos.
Namahayag si Police Regional Office 10 spokesperson Police Maj. Joann Navarro nga naka-full alert status ang tibuok puwersa sa PNP samtang aktibo usab nga miabag ang kasundaluhan ilabina pagsanta sa mga posibleng sabotahe alayon sa kalihukan.
Hinoon,pabiling walay nadawatan nga seryosong bahad sa seguridad ang PNP ug AFP apan dili sila mohatag kumpiyansa hangtod saulugan ang Domingo sa pagkabanhaw.
Samtang gipadumduman ang mga deboto nga sundon ang mga gabayan nga gihan-ay sa city govt nga natahas sa kabarangayan nga ipatuman sulod sa nag-unang pilgrimage sites ning syudad.
Partikular nga gipaniguro nga mapasunod ni Tablon Punong Brgy Romeo Bacarro ang safety guidelines sa mga deboto nga motabok sa siyam ka sapa ayha makaabot sa kapamilya sa Our Lady of Guadalupe aron mamalandong.
Miingon si Bacarro nga igo ang nahatag nga puwersa sa city govt ug miabag na lang sila sa pagsiguro nga walay mga bisita ilabina sa kababayen-an nga mabutang sa peligro samtang tabukon ang mga sapa sugod ning adlawa.
Sa pikas bahin,istrikto usab ipatuman ngadto sa mga deboto ang curfew hours ug ubang gipangdili samtang dili hingpit makasulod sa pilgrimage site ilabina sa 14 station of the cross sa bukid sa Malasag,Brgy Cugman ning syudad.
Kini ang tahas nga gisangon sa incident management team o IMT ngadto sa grupo ni Cugman Punong Brgy Luisa Aldeguer diin apil ang iyang lugar gidasmagan sa libuang mga deboto sugod pa kaganihang kadlawon.
Namahayag si kanhi Cugman brgy kagawad ug karon consultant Engr Elmer Cotiamco nga apil sa ilang hugot gidili ang pagpasulod sa mga ilimon nga makahatag sa kagubot kon mga hubog na ang nakupot niini.
Nagpdumdom usab kini sa kababayen-an nga likayan ang pagsul-ob sa mga sapot nga maka-disturbo sa panan-aw sa uban sanglit pagpamalandong ug dili party ang ilang gidalikyatan sa Malasag.
