Bug-at ang gibilin nga mensahe ni Pope Leo XIV sa iyang homiliya sa canonization mass nila Saint Carlo Acutis ug Saint Pier Giorgio Frassati.
Miingon ang Santo Papa nga ang duha ka batan-ong santos nagpakita sa gahum sa pagkabalaan sa kabatan-onan sa lain-laing panahon.
Gibutyag ni Pope Leo nga si Carlo, isip “millenial”, napuslan niya ang teknolohiya pinaagi sa debosyon sa Eucharista.
Samtang si Santo Pier Giorgio, mihimo’g aktibong pag-alagad sa kabus, taliwala sa ilang pagka-adunahan, ug gipuy-an ang kinabuhi nga puno sa kalipay ug espiritwal nga kusog.
Gipalanog sa Santo Papa nga ang tinuod nga bahandi dili ang kadato o kahayahay, kundili ang pag-alagad sa Diyos ug ang pagpas-an sa krus uban kang Kristo.
Gihisgutan sa Homiliya ang paghulagway sa kinabuhi ni Haring Solomon nga nangayo sa kinaadman, ug ang mga santos sama nila Saint Francis of Assisi ug Saint Augustine nga mibiya sa daang kinabuhi aron mosunod sa tawag sa Ginoo.
Pinaagi sa mensahe, mi-ingon ang Papa nga ang pinakadako nga risgo sa kinabuhi mao ang pag-usik niini gawas sa plano sa Diyos.
Nanawagan si Pope Leo XIV sa tanang kabatan-onan nga mahimong buhi nga ehemplo sa pagkabalaan, nga magkinabuhi nga puno sa gugma, paglaum, ug kaisog alang sa Ginoo.
Full video please click here: https://www.youtube.com/watch?v=9eAAfL-hwCI
