Hugot nga gipalig-on ni Atty. Jojo Lacanilao, convenor sa Duterte Panagutin Campaign Network ang panawagan alang sa hustisya batok sa mga dugoong kampanya sa miaging administrasyon.
Gipasiugda sa maong abogado nga ang pagdangop sa International Criminal Court (ICC) maoy bugtong dalan tungod sa giingong kakuwang sa kaisog sa lokal nga korte sa pag-imbestigar sa mga pagpamatay.
Matud ni Lacanilao, klaro ang mga ebidensya nga nagpunting sa usa ka sistematikong polisiya sa Extra-Judicial Killings nga mikalas sa kinabuhi sa liboan ka mga biktima.
Gibutyag usab niini nga ang pagpadayon sa trial stage sa ICC usa ka dakong kadaogan alang sa mga pamilyang nahikawan og katarungan sulod sa daghang katuigan.
Malaumon ang grupo nga kining maong lakang magsilbing leksyon aron dili na masubli pa ang bisan unsang porma sa pag-abuso sa gahum ug katungod sa tawo dinhi sa nasud. (jane abulag)
