CAGAYAN DE ORO CITY – Dili lang pagtul-id ug pagpalig-on apan pa-ilisdan aron mapuliha’g bag-o ang rason kon nganong gi-aprobahan sa Dept of Budget and Management o DBM ang hangyo sa Department of Public Works and Highways o DPWH -10 kabahin sa iconic Carmen Bridge ning syudad.
Kini ang gitaho ni DPWH -10 regional director Zenaida Tan kabahin sa kahimtang sa dekada 40 nga tulay kay alang kanila peligro na sa publiko hinungdang angay ayuhon.
Miingon si Tan nga aprobado sa DPWH central office ang una nilang hangyo nga retrofitting program of works apan mas gusto sa DBM nga pulihan ang tanang materyales niini.
Siya miingon nga kon supakon sa National Historical Commission ang plano sa DBM,e-uli usab nila ang pasiunang pondo kay dili man pagtul-id apan paghulip ang rason nga nahatagan sa 900 milyones pesos nga gahin ang proyekto alang niini.
Gipasabot ni Tan nga maglisod sila’g patuman kon pag-ayo lang kay sukwahi kini sa 2024 General Appropriations Act.
Samtang alang usab sa grupong Kagayan Heritage Advocate o KHA nga wala sila mabalaka sa kalit pag-usab sa tono sa DPWH.
Namahayag si KHA member Engr. Raul Ilogon nga kon tinood ang gisulti sa DPWH nga ang DBM maoy nangusog dili usab kini mabasol sa katawhan.
Apan gipadumdom ni Ilogon sa tanang pundok nga nag-interes pagpagguba sa tulay nga Republika sa Pilipinas na ang makontra niini.
Kini tungod kay dili lang ang local govt unit sa syudad ang dunay katungod maghatag proteksyon niini apan nagsilbi na kining registered cultural property sa nasud.
Miingon si Ilogon nga nagkahulugan nga protektado sa bisan unsa nga pagtandog o pagguba ang tulay rason nga makontra sa DBM ug ubang grupo ang mismong nasudnong balaod sa Pilipinas.
Hisayrang sa miaging pagtuki sa maong katuyuan,unang nag-interes usab ang city govt nga himoong four lanes ang tulay kon ma-aprobahan ang pagtrabaho niini.
