CAGAYAN DE ORO CITY, Philippines – Mihinay ang importasyon sa bugas sa nasud, bisan pa sa pinal nga pagpatuman sa Executive Order 62 nga nagpaubos sa taripa nga gisingil sa imported nga bugas.
Segun sa unod sa report sa Bureau of Plant Industry (BPI), anaa lamang sa 56,073 metric tons sa bugas ang gi-import sa mga negosyante hangtod sa tunga-tunga sa Hulyo.
Ang pag-import gipaagi sa 15% nga taripa.
Mas ubos pa kini sa kasagaran nga binulan nga pag-abot sa import products gikan sa Enero hangtod Hunyo nga 400,000 MT.
Mipasabot si Department of Agriculture (DA) Assistant Secretary ug spokesperson Arnel de Mesa, nga mahimong magpadayon ang pag-release sa mga importer sa ilang stock nga napalit niadtong 35% pa ang singil sa taripa.
Una niini, gilauman nga musaka ang volume sa bugas sa bulan sa Agosto, ug taas ang tsansa nga makamugna kining dakung epekto sa retail price sa bugas sa merkado.
