CAGAYAN DE ORO CITY – Gibuhian una sa kapolisan ang usa ka inahan nga gitudlong mitu-ok patay sa 4 anyos nga anak-babaye niini sulod sa pansayan sa Brgy Agusan ning syudad.
Kini subay sa gisulti ni Police Capt Earl Cartagena,hepe sa Women & Children Protection Desk sa Cagayan de Oro City Police Office atubangan sa prensa nga nangayo’g update sa aksyon ngadto sa hitabo.
Miingon sa Cartagena nga tungod kay gipalig-on pa ang ipasaka nga kaso batok sa maong inahan,gihatagan una kini’g temporaryong kagawasan.
Una niini,giulan sa pagbatikos sa social media ang maong inahan kung nganong giingong gipatay niya’g unay ang kaugalingong anak niini sa miaging semana.
Nanggawas pa ang impormasyon apan wala kompirmaha nga nahinaykan sa suspek ang bata kay dugay nauli ang ilang pinuy-anan ang kapikas niini.
Gipasabot usab ni Cartagena nga may katungod ang bana nga moduso’g kaso sa piskalya batok sa kaugalingon niining kapikas.
