CAGAYAN DE ORO CITY – Gikasubo sa mga kabanay,mga su-od nga higala ingon man mga kauban sa pagtoo ang gidangatang-kamatayon sa American missionary tungod ‘road crash’ o aksidente sa kalsada sa Talakag, Bukidnon.
Kini human wala masalbar ang kinabuhi sa biktima nga si William Isaac Cannon,75 anyos,minyo,Baptist missionary ug retiradong US army member nga taga- Amerika apan nagpuyo na sa Golden Glow,Brgy Carmen sa Cagayan de Oro City.
Sa inisyal nga imbestigasyon ni Talakag Municipal Police Station investigator Police Master Sgt Dennis Bernaldez, nahiagom sa seryosong bun-og sa kalawasan ang biktima epekto sa panagbangga sa duha ka motorsiklo sa lugar.
Saysay ni Bernaldez nga kusog ang dagan sa motorsiklo gimaneho ni Cannon ug nabanggaan niini ang laing motorsiklo hinungdan sa hitabo.
Sa kakusog sa impact, nagrabehan ang misyonaryong langyaw ug naangol usab ang usa sa mga sakay sa pikas motorsiklo nga gimaneho ni Ronron Gadian.
Gilayong gipang-dala sa Bukidnon Provincial Hospital-Talakag ang biktima apan dead on arrival si Cannon.
Sa pagkutlo ning balita, kasamtangan pang nakahaya ang lawas sa biktima ug gitakdang ilubong dinhi sa syudad ugmang adlawa.
Dumduman nga anaa sa Talakag sa Cannon kay may plano unta kini magpalapad sa pangsayaw sa ebanghelasyon kuyog ang pipila ka Filipino Christian counterparts niini.
Hisayrang natigayon ang dugu-ong hitabo sa Sitio Landing,Brgy San Isidro niadtong petsa 16 sa Abril 2026.
