Gipadayag sa IP Rights Defender nga si Wilson Amad nga angay untang ipatuman ang balaod nga magpugos sa mga kandidato sa nasudnong posisyon nga moagi og tulo ka bulan nga immersion sa nagkalain-laing sektor sa katilingban.
Subay niini, kinahanglan nga makasinati sila og tulo ka bulan nga pagpuyo uban sa urban poor aron masabtan ang tinuod nga kahimtang sa mga kabus.
Dugang pa niini, gikinahanglan usab ang laing tulo ka bulan nga pagsinati sa lisod nga kinabuhi sa mga mangingisda sa lawod lakip na ang mga mag-uuma sa kaumahan.
Nagtuo si Amad nga ang tulo ka bulan nga pagpuyo uban sa mga lumad ang magsilbing kataposang sukdanan aron mahimo silang kwalipikado nga modagan sa gobyerno.
Tungod niini, nagtuo ang IP rights Defender nga kini nga proseso makahatag kanila og lawom nga pagsabot sa reyalidad sa kinabuhi sa mga ordinaryong Pilipino sa dili pa sila mohupot og katungdanan.
