CAGAYAN DE ORO CITY – Ilusad ang labing engranding pagbukas sa HIV Community Center nga gisunod sa ngalan ni 2015 Miss Universe Pia Wurtzbach ning syudad karong hapon lamang.
Ang grand launching sa community center, gipaluyuhan ug idumala sa grupong Kagay-an Preserving Life, Uniting Society, Inc o K-PLUS.
Kini nga center ilahon sa ngalang “ORO PIA COMMUNITY CENTER” nga nahimutang sa Gates 2 ug 3 sa Nuevas Bldg. 8th – 21st Street Nazareth ning syudad.
Miingon si Enrique Niño Patricio, RN ug Executive Director sa K-PLUS nga libre ang ilang ihatag nga serbisyo alang sa tanan gustong magpa-counsel, ug kadtong nagduda nga nataptan sa Human Immunodefeciency Virus kon HIV.
Gawas sa libreng HIV testing, gisaad sa K-PLUS nga himoong confidential ang tanan impormasyon sa mga mupaubos sa test.
Bukas ang ilang center matag Miyerkules hangtud Domingo alas 2 sa hapon hangtud alas 10 sa gabii.
“We need to push our efforts towards reaching out to the key affected populations to know their HIV status, because there are people who are willing to help,” matud ni Patricio.
Una niini, usa sa special guest ang Cagayan-anon beauty queen kinsa kasamtangang UNAIDS Goodwill Ambassador for Asia and the Pacific.
Mahinumduman, nag-unang adbokasiya ni Wurtzbach ang paggamit sa iyang tingog aron masanta ang HIV-AIDs sa kalibutan.
“I’m grateful for my LoveYourself family together with our partner Kagay-an PLUS, Inc. in naming the center after me, but more than that, the creation of Oro Pia is truly a timely and relevant response to curb the HIV epidemic in CDO,” ingon ni Wurtzbach
