CAGAYAN DE ORO CITY, Philippines – Misaka pa sa “good” kon +40% sa bulan sa Hunyo, ang net satisfaction rating sa administrasyon ni Presidente Ferdinand Marcos Jr, itande sa moderate +29 sa bulan sa Marso ning tuiga.
Subay sa labing lab-as nga survey nga gipagawas sa Social Weather Stations (SWS), 62% sa adult Filipinos ang ‘satisfied’ sa pagdumala ni Marcos, samtang 22% ang ‘dissatisfied’ o wala ganahi, ug 15% ang ‘neutral’.
“Very Good” (+64) ang grado sa administrasyon sa pagtabang sa mga biktima sa kalamidad, (+62) pag-improbar sa edukasyon sa mga bata, (+51) pagtabang sa mga kabus, (+47) pag-implementar sa housing programs sa mga kabus, (+46) pagpalambo sa science and technology, (+45) sa pagpamugna sa palisiya nga nakamugna sa daghang trabaho, (+38) sa pagpaniguro sa episyente nga public transportation system ug (+35) sa food security.
Dugtong niini, ang gobyerno midawat sa “moderate” remark kon (+29) nga grado mahitungod sa isyu sa pagpangandam sa mga suliran tali sa climate change, (+22) sa pagdepensa sa soberiniya sa Pilipinas sa West Philippine Sea, ug (+18) sa pagpaningkamot nga walay pamilya nga magutman ug walay makaon.
Sa pikas bahin, bagsak nga grado ang nadawat sa gobyerno sa isyu sa iflation o pagsaka sa batakang palaliton nga mitala sa (-16) ug lain (-10) nga grado alang sa pagsanta sa graft and corruption.
Gihimo ang survey niadtong Hunyo 23 padulong Hulyo 1 sa Luzon, Visayas ug Mindanao, kundiin nahinabi sa SWS ang 1,200 ka partisipante.
