Galaum ang kampo ni Senador Ronald “Bato” dela Rosa nga aksyonan na sa Korte Suprema ang gipasaka nilang bag-ong manipestasyon bag-ohay pa lamang.
Matud sa legal counsel sa senador nga si Atty. Israelito Torreon, giampo nila nga mobuhat na og aksyon ang hukmanan mahitungod niini.
Gihangyo sa ilang kampo nga hatagan og higayon o irekonsidera sa Korte Suprema ang nahimong desisyon niini sa miagi nilang manipestasyon.
Mahiumdoman nga wala tugoti ang ilang hangyo nga pugngan unta ang implementasyon sa arrest warrant gikan sa International Criminal Court tungod kay matud pa wala kini igong basihan.
Tinguha sa ilang pinakabag-ong manipestasyon nga aghaton ang Korte Suprema na balihon ang una nang desisyon niini ug hingpit na nga mag-isyu og Temporary Restraining Order aron babagan ang pagdala sa senador ngadto sa International Tribunal.
Dugtong niini, galaum usab ang maong kampo nga lakip nga hatagan og aksyon sa hukmanan ang gigikanan sa maong petisyon nag gakuwestiyon usab sa legalidad sa pagdala kang kanhi Presidente Rodrigo Duterte padulong sa The Hague, Netherlands. (raniel mahunyag)
