Napugos ang Ministry of Health sa Malaysia sa pagpatuman sa lapad nga suspensyon sa klase karong Oktubre tungod sa kusog nga pagkuyanap sa influenza virus sa mga tunghaan.
Subay sa mga report, ang mga sintomas sama sa trangkaso, hilanat, ubo, ug sip-on dali nga mikatag sa mga elementarya ug sekundaryang tunghaan sukad pa sa bulan sa Setyembre.
Gibanabana nga kapin 6,000 ka mga estudyante ang naapektuhan sa maong outbreak, gawas pa sa mga out-of-school youth nga posibleng natakdan apan wala marekord.
Sa miaging adlaw, gipatuman ang nationwide class suspension aron matutukan sa mga otoridad ang hinungdan sa paspas nga pagkuyanap sa sakit.
Kagahapon, ang inisyal nga resulta sa imbestigasyon nakarekord sa 100 ka flu clusters ug 8.2% nga kaso nga nalambigit sa bag-ong COVID-19 variant nga gitawag nga XFG.
Kini nga variant giila nga taas ang “transmissibility” apan ubos ang risgo sa seryosong epekto sa lawas.
Ang World Health Organization (WHO) nagpadala na sa ilang mga representante aron motan-aw sa kahimtang sa nasud. Sa estado sa Selangor, nga usa sa labing daghang populasyon sa Malaysia, daghang tunghaan ang napugos sa pagsira.
Apil niini ang mga eskwelahan nga nag-andam unta sa quarterly exams sa ilawom sa Sijil Pelajaran Malaysia (SPM), nga gilauman untang salmutan sa kapin 400,000 ka mga estudyante.
Sa tibuok tuig 2025, anaa sa 43,087 ka kaso sa COVID-19 ang natala sa Malaysia, apan 49% ang pagkunhod niini itandi sa miaging tuig.
Bisan pa man sa pagkunhod sa kaso, nagpabilin ang kabalaka sa mga otoridad tungod sa kombinasyon sa influenza outbreak ug sa presensya sa bag-ong COVID variant.
