CAGAYAN DE ORO CITY – Gipalig-on pa sa grupo nila ni kanhi konsehal Eric Salcedo,Dr. Reuben Daba ug late Kag. Teodulfo Lao Jr ang ilang krusada nga wad-a’g bili ang kontrata tali sa Cagayan de Oro Water District ug MetroPac Water pinaagi sa Cagayan de Oro Bulk Water Incorporated o COBI.
Kini human kompirmaha ni Salcedo nga gibalik nila’g duso ang kaso sa Philippine Competition Commission o PCC didto sa kauluhan.
Miingon si Salcedo nga gamit ang nakuptan nila nga mga ebedensiy,nagtoo sila nga dako’g tsansa nga ma-deklara nga illegal ug disadvantageous sa interes sa katawhan ang COWD-COBI contract.
Sa pikas bahin,wala sa gahom ni City Mayor Rolando ‘Klarex’ Uy nga ipalayas apan pabiling abli alang sa paserbisyo sa MetroPac Water-COBI ning syudad.
Katin-awan kini sa mayor sa tinguha sa iyang mga kaalyado sa politika nga dili na hataga’g higayon ang COBI makabaligya’g tubig sa COWD kay nagbaton sa kontrata nga disbintaha sa katawhan.
Miingon si Uy nga bugtong gusto lang niini nga usbon ang pipila ka probisyon sa COWD-COBI contract ilabina ang kada-tulo ka tuig nga otomatikong water rate increase.
Sa pagkutlo ning balita,pabiling wala pa’y panagsinabot ang COWD-COBI sa isyu sa bayrunon diin nakaung-ong ang bahad nga pagputol sa suplay sa Abril 30.
