CAGAYAN DE ORO CITY – Kasuhan sa large scale estafa ang usa sa mga nadakpan nga nagpatoong miembro sa Pearl of the Orient International Marian Workers Missionary Foundation Corporation ning syudad.
Ang suspek naila nga si Kris Shiela Nellies, 62-anyos ug residente sa St Ignatius, Brgy Macasandig ning syudad.
Matud ni Cogon Police Station investigator Staff Master Sgt Niel delas Alas nga nangolekta’g tig-300 pesos membership fee ang suspek sa mga senior citizen diha sa Brgy 40 nga walay resibo.
Asoy ni De las Alas nga nagpasalig ang suspek nga bugti sa ilang gibayad nga membership fee ang P12,000 month pension, house and lot ug debit card nga nagkantidad sa dos milyon pesos.
Samtang, mohimo’g katiguman ang komitiba sa trade and commerce sa konseho sa mga ahensiya nga dunay hurisrdisksyon sa pagsanta sa nagkadaiyang investment scam ning syudad.
Kini human unang naalarma si Kag George Goking kinsa chairman sa komitiba sa laing pagpangilad diin nahimong target ang senior citizens sa dakbayan.
Miingon si Goking nga gikalipay niini nga paspas naka-aksyon ang kapolisan aron mabulgar ang giingong ilegal nga kalihukan sa Pearl of the Orient International Marian Workers Missionary Foundation Corporation nga nangbiktima sa lolo ug lola sa syudad.
