Napagawas na ang mga baruganan sa Mahistrado sa Korte Suprema, kalabot sa gihangyo nga Temporary Restraining Order (TRO) ni Senador Ronald Bato dela Rosa, lakip na ang iyang petisyon sa status quo ante order (SQAO) batok sa posibleng pag-aresto kaniya pinasikad sa warrant of arrest nga gipagawas sa International Criminal Court (ICC).
Subay sa naglabay nga special En Banc Session niadtong Mayo 20, ang Korte Suprema nagpagula sa resulta nga 9-5-1 aron dili pagtagaan ang senador sa iyang duha ka hangyo.
Ang siyam mi-uyon nga ibasura ang mga petisyon, samtang ang lima, misupak. Adunay usa ka mahistrado ang absent niadtong tungura ug wala nalakip ang iyang opinyon sa napalugwa nga mga dokumento sa official facebook page sa SC.
Sa lima ka mga mahistrado nga misupak sa pagbasura sa TRO sa senador, si Judge Ramon Paul Hernando miingon nga wala pay napatuman nga proseso sa korte sa Pilipinas nga nagtugot sa pagsikop o pagtahan sa ICC.
Siya miingon nga “zero guarantee” nga dili dayon dad-on si Dela Rosa sa The Hague kon masikpop.
Si Judge Amy Lazaro-Javier, mitin-aw nga ang paghatag sa injunctive relief kinahanglan ibase sa lawom nga pag-analisar, ug dili kini ibase sa personalidad o politika.
Siya miingon nga tataw kaayon nga dili na ma-ayo ang posibleng kadaot kon dili hatagan si Dela Rosa.
Si Judge Henri Jean Paul Inting – namugos nga kinahanglan ang SQAO aron dili mawala ang kahulugan sa kaso kon matuman ang ICC arrest warrant.
Samtang si Judge Ricardo Rosario mipadayag nga ang pag-aresto sa usa ka elected nga opisyal pinasikad sa ICC warrant adunay “questionable constitutional, statutory, and jurisdictional grounds.” Kon walay TRO, mahimong maapektuhan ang soberanya ug gahum sa hudikatura sa Pilipinas.
Si Judge Antonio Kho Jr. , miingon nga natuman ni Dela Rosa ang tanang rekisito alang sa TRO ug SQAO, kundiin, sa oras nga siya masikop ug mabalhog sa ICC, lisod na siya mobalik sa Pilipinas bisan pa kon mohatag sa pabor nga desisyon ang Korte Suprema
