CAGAYAN DE ORO CITY – Dili na angay idangop kang Pres Bongbong Marcos ang isyu sa panubig sa dakbayan.
Kini human napugos pagbulgar si City Mayor Rolando ‘Klarex’ Uy nga dunay upat ka sinugo si Marcos gikan sa Malakanyang nga pagsusi sa tinud-anay nga kahimtang sa tubig sa syudad.
Miingon si Uy nga gihatagan usab nila’g kopya sa kontrata ang mga sinugo sa presidente aron dunay direktang kasayuran sa COWD-COBI contractual conflict.
Tubag kini ni Uy sa plano ni Cagayan de Oro 1st District Cong. Lordan Suan nga kon dunay tsansa pangayuan niya’g tabang si Marcos alang sa lahutay nga sulbad sa dugay nang suliran sa panubig sa dakbayan.
Una nang giduot sa laing sa higayon ni Uy ang kanhi administration ni former City Mayor Oscar Moreno nga tipik sa rason sa kagubot kay dugay gitaguan ang kontrata sa panubig sa syudad.
Apan sa mga miaging pahayag usab ni Moreno,namugos kini nga dili angay kalimtan ug kinahanglan magbaton sa kabubut-on ang kasamtangang administrasyon kay ang COBI maoy mitubag sa kakulagon sa panubig sa 1/3 population sa unang distrito nga walay klarong tubig sukad tuig 2017.
