CAGAYAN DE ORO CITY – Gibasol ni kanhi City Mayor Oscar Moreno ngadto kang incumbent City Mayor Rolando ‘Klarex’ Uy ang pakyas nga pagsilbing high performing local govt unit sa Cagayan de Oro City sa Northern Mindanao.
Kini ang reaksyon ni Moreno bisan nga mihatag na’g pagpasabot ang Department of Interior and Local Government o DILG-Cagayan de Oro nga epekto kini sa gamay’ng diskripansi sa peace and order council audit nga kabahin sa basehan pagkab-ot unta sa Seal of Good Local Governance sa tuig 2023.
Unang gibutyag ni DILG -City Director Edward Bhagwani nga milagpat ang syudad sa 75 percent passing rate sa PoC kay nasagol ang criminality record data gikan tuig 2022 hangtod 2023.
Kini ang rason nga 73.6 porsiento lang ang nakuhang grado sa syudad gikan sa computer generated printout sa Philippine National Police regional assessment.
Epekto sa wala gilayong pagkakit-i ug dunay ‘miscommunication’ tali sa regional assessor sa PNP ug Cagayan de Oro City Police Office,wala na kini naapas pa bisan sa gipasa nga apelar sa city govt didto sa kauluhan.
Apan gibutyag ni Moreno wala motakdo ang pagpasabot sa DILG-CdeO sa pagkabagsak sa city govt sa maong area sa SGLG award quest.
Samtang luyo sa batikos ni Moreno batok sa city govt, daan nang nakahimo’g apelar si Mayor Klarex ngadto sa dept managers nga pangunayan ang pag-atiman sa SGLG evaluators sa miaging Oktobre 5,2023.
Kini tungod kay tinguha unta sa dakbayan nga subli makuha ang ikaduhang pinakadako nga kadungganan alang sa katawhan.
Gani,miingon ang mayor nga alang kaniya ang maong gimbuhaton apan kadungganan sa katawhan kon masakmit ang ikaduhang SGLG award.
Nahimo pang sumsuman ang unang kadaugan sa SGLG kay namugos ang kampo ni Moreno nga hinaguan sa iyang panahon ang gibasehan niini ug igo na lang midawat ang administrasyon ni Uy.
Hisayrang nagka-aslom ang relasyong-politika sa duruha igo paghuman sa 2022 elections rason nga sila mag-engkuwentro pagka-mayor sa 2025 midterm elections.
