CAGAYAN DE ORO CITY – Gihinaut ni City Mayor Klarex Uy nga unta naghatag sa dakong paghigmata ang pag-igo sa ‘urban flooding’ sa pipila ka urban ug rural barangays diin nahasol ang daghang residente epekto sa pagbaha ning syudad.
Kini ang mensahe sa mayor epekto sa grabeng pagsaway nga nadawatan niini kabahin sa dugay nang suliran sa mga pagbaha particular nga miigo pipila ka kabarangayan sa syudad sa miaging Martes.
Miingon si Klarex nga ang pagpasagad sa pipila ka residente sa ilang mga basura sa nagkadaiyang kanal ang kabahin sa bug-at nga rason nganong adunay pagkawas sa tubig-baha ug manulod sa kabalayan.
Siya miingon nga angayang dumdumon sa katawhan nga makawang lang ang paningkamot sa mga opisyal sa kabarangayan kung mismo sila ang walay kooperasyon ug pagpakabana diin mobalik ra gihapon ang epekto niini kanila pinaagi sa makaliton nga mga pagbaha.
Dumduman nga nakuratan ang katawhan sa Brgy Indahag ingon man sa Brgy Camaman-an sa kalit nga pagkawas sa tubig-baha nga misubay sa kadalanan ayha nanulod sa daghang kabalayan rason napgugos sila pagbakwit Martes sa gabii.
Hinoon,walay gikataho nga mga residente nga missing,naangol o namatay sa dala nga pag-ulan sa hanging Habagat nga mihatag pagbaha sa ubay-ubay’ng kabarangayan sa urban area ning syudad.
