CAGAYAN DE ORO CITY – Walay paglaylo sa ilang pakigbatok ang grupong Federation of Free Workers o FFW nga hingpit mawagtang ang ‘labor only contracting’ sulod sa mga pribadong panarbaho sa nasud.
Kini samtang dumdumon na usab sa gobierno ang dakong papel sa mga mamumuo alayon sa ika-122 nga tuig sa Labor Day sa Mayo 1 ning tuiga.
Namahayag si FFW legal counsel Atty. Proculo Sarmen nga angayang mahatagan sa patas ug tawhanon nga proteksyon ang mga trabahante kay aron epektibo sila sa produksyon nga mopalambo sa ekonomiya sa nasud.
Sa pikas bahin,dili lang importante apan mismo ang mga mamumuo ang yawe paghatag sa maayong produksyon aron molihok ang ekonomiya sa nasud.
Kini ang pag-uyon ni DOLE 10 asst regional director Atty. Russel Jallorina kabahin sa paghatag bili sa dakong papel sa mga trabahante sa publiko ug pribadong sektor.
Namahayag si Jallorina nga dili igo nga isaulog ang LABOR Day aron dumdumon ang mga mamumuo apan mismo sila ang nagpalambo sa usa ka ekonomiya rason nga angay mahatag ang seguridad sa trabaho ug mga tukmang mga benepisyo.
