Mas priyoridad sa mga miyembro sa LGBTQ community ang pagpadayag sa ilang tingog batok sa korapsyon nga naghampak sa nasod imbes nga mogasto og pundo para sa pagselebrar sa Pride Month karong Hunyo.
Subay sa pamahayag ni Atty. Samantha Tan, ang Legal Counsel sa LGBT Pilipinas, dili makatarunganon ang paggasto og kwarta sa mga kalihokan karong panahona tungod kay mas gikinahanglan ang pagtutok sa ekonomiya ug ang pagtabang sa mga tawo nga nag-antos sa gutom.
Dugang pa, gihagit niya ang mga lider sa LGBT Pilipinas nga dili una magpunting sa mga katungod o rights, kundili magtutok sa kung unsa ang insakto o righteousness nga angay buhaton karon.
Alang kaniya, mas gikinahanglan ang pag-edukar sa mga anak sa mga ginikanan aron masiguro ang kaugmaon sa nasod ug dili na kini magpadayon sa kalisod.
Gihatagan usab niya og gibug-aton nga dili pa karon panahon sa pagpasigarbo, kondili panahon kini sa pagtabang sa mga tawo nga nanginahanglan og pagkaon diha sa ilang mga lamesa.
