CAGAYAN DE ORO CITY – Gihupay sa Local Water Utilities Administration o LWUA appointed interim officials nga nagkahiusa ang management committee o mancom sa batok pipila ka indibidwal nga gusto magkagubot ang Cagayan de Oro Water District o COWD sa syudad.
Kini human kompirmaha ni interim COWD General Manager Fermin Jarales nga gisulaya’g haylo sa regular board of directors ang mancon nga dili suportahan ang LWUA takeover ug mokuyog sa pagduso’g kaso sa husgado.
Miingon si Jarales nga unta motabang na lang ang COWD board of directors nga temporaryo nila gipulihan aron tinud-anay nga dunay sulbad ang daghang suliran sa sistemang panubig sa dakbayan.
Dumduman nga wala tahura apan gisupak sa regular COWD BoDs ang pagsulod sa interim officials ning syudad.
Samtang gihimakak usab ni regular COWD board of director Gerry Caño ang pasangil sa interim officials nga binuhatan nila ang pagkumbinser sa mga empleyado aron mag-protesta.
Namahayag si Caño nga nakadungog kini sa maong impormasyon apan dakong bakak ang pasiatab nga ilang gisul-sulan ang COWD employees aron sulsulan nga kontrahon ang interim officials.
