(Update)CAGAYAN DE ORO CITY – Gitoohan nga dugay nang nag-antos sa grabeng depresyon ang amahan nga person with disability rason nga iyang gipusil-patay ang kaugalingong kapikas nga magtutudlo sa national high school sa Valencia City,Bukidnon.
Kini ang personal nga assessment ni Stella Ferrarez,mental health advocate kabahin sa sakit nga kamatayon sa biktima nga si Ivy Lou Tamulac dihang hingpit nabugtuan sa kinabuhi samtang gitabang sa mga doktor sa Northern Mindanao Center sa miaging semana.
Miingon si Ferrarez nga wala sa normal nga panghuna-huna ang usa ka tawo nga mohunos sa minahal niya sa kinabuhi kon wala kini nag-atubang sa bug-at nga suliran.
Dumduman nga mibati’g grabeng selos ang suspek nga si Ramonito Tamulac sa iyang kapikas sukad nabaldado kini gikan sa disgrasya niadto.
Dumduman nga naigo sa kalibre 45 ang agtang ni Ivy samtang gilayon usab nagpusil-patay sa kaugalingon si Ramonito sulod sa ilang kuwarto niadtong Sabado sa udto.
Hisayrang gilayong gi-respondehan ni Valencia City Police Station commander Lt Col Mitchelle Clemencion ang crime scene diin nakit-an nila ang patay’ng lawas ni Ramonito sulod sa kuwarto.
