CAGAYAN DE ORO CITY – Bakak ang gihimong pahayag sa mag-amahang kanhi City Mayor Oscar Moreno ug incumbent 1st District City Councilor Imee Moreno kabahin sa giingong nagka-gidlay nga kahimtang sa multi-million peso engineered sanitary landfill nga nahimutang sa Brgy Pagalungan ning syudad.
Kini maoy gipalanog nga resbak ni City Mayor Rolando ‘Klarex’ Uy subay sa site inspection ni CLENRO manager Engr Armen Cuenca sinaksihan sa sobra 20 ka sakop sa media sa miaging adlaw’ng Huwebes.
Namahayag ang mayor nga napamatud-an nga nag-imbento lang ang mag-amahang Moreno sa ilang estorya nga puno na ang basurahan kay kulang sa pag-atiman kay sukwahi kini sa nakit-an sa ilang giimbitar nga sakop sa media didto sa lugar.
Dumduman nga gisingil ni Imee si Kag. Imee ug environment committee chairman Kag. Roger Abaday kon nganong wala aksyuni ang special report sa konseho nunot sa tinud-anay nga kahimtang sa landfill.
Samtang gikalipay ni kanhi City Mayor Oscar Moreno ang gihimong aktuwal nga pagsusi sa CLENRO kuyog ang mga sakop sa media sa kahimtang sa engineered sanitary landfill sa dakbayan.
Epekto kini sa gibarugan ni Moreno nunot sa tinud-anay nga sitwasyon sa mga gipang-kolekta nga basura dad-on sa maong lugar.
Apan hagit ni Moreno nga dili ‘ningas cogon’ ang gihimo sa city govt aron ma-sustenir ang pagtubag sa suliran sa mga basura sa dakbayan.
Una nang namugos ang pipila ka sakop sa media nga duol sa city hall nga walay baho ug dili usab tinood nga dunay mismanagement sa pag-atiman sa mga basura sa dakbayan.
