CAGAYAN DE ORO CITY – Dakong illegal ang giingong sekretong pinirmahay tali City Mayor Rolando ‘Klarex’ Uy tali sa partido o grupo nga may kalambigitan sa pagpangutang sa binilyong salapi sa bangko kay ipalit sa yuta aron balhinan sa bag-ong city hall ning syudad.
Kini ang gibutyag ni kanhi City Mayor Oscar Moreno nunot sa paghatag pagtugot sa konseho aron mosulod sa memorandum of agreement ug deed of sale ang city govt alang sa binilyong transaksyon sa dakbayan.
Miingon si Moreno nga Disyembre 23,2023 pa dunay pinirmahay diin gitratar niya nga dakong supak sa balaod ang gihimo sa dakbayan.
Una niini,sa miaging Abril 22 ning tuiga pa lang napalabang ang ordinansa sa konseho nga nagtugot kang Uy mosulod sa bank loan balor 2.7 bilyones pesos ug deed of sale alang sa pamilyang Cid nga tag-iya sa yuta nga tukuran sa bag-ong city hall.
Dumduman nga gi-depensa ni Kag. Edgar Cabanlas ang pagpasar nila sa maong ordinansa kay gipangayo kini sa bangko alang sa pagpangutang sa syudad.
Namahayag si Cabanlas nga wala na’y angay lalisan sa maong isyu kay daghang sesyon na nga gituki kini ug napalabang na ang pag-uyon sa plano sa opisyal-ehekutibo alang sa pagpalit sa yuta ug pagtukod sa bag-ong city hall.
Sa pagkutlo usab ning balita, wala pa’y direktang tubag niini si Uy bisan ang iyang mga alyado sa konseho batok sa pahayag sa kanhi mayor.
Hisayrang ang plano nga pagbalhin sa city hall gikan sa orihinal nga lokasyon niini ang panahon pa ni late City Mayor Vicente ‘Dongkoy’ Emano nga igo lang gipadayon sa administrasyon ni Mayor Klarex.
